GJELOSHAJ: FLAMURI SHQIPTAR THERRË NË SY TË POLICISË SË MZ

0
14

Kryetari i Alternativës Shqiptare, Nik Gjeloshaj, tha se kohën e fundit flamuri shqiptarë është bërë therrë në sytë e zyrtarëve policorë në Ulqin dhe Malësi.
“Me keqardhje, konstatojmë veprimin jo-kulturorë dhe anti-civilizues të disa zyrtarëve policorë, si dhe të gjykatës për shkelje penale të cilët vendosën që të merren me punë qorre”, tha Gjeloshaj.Sipas Gjeloshaj, nuk mundet policia dhe as gjykatat, sa do që të përpiqen të frikësojnë dhe të ndalojnë shqiptarët që të mbajnë dhe shprehin dashurinë e tyre për flamurin tonë kombëtar.

“Sa do që të angazhohen, nuk janë në gjendje të dënojnë sa jemi të gatshëm të paguajmë, për të mbrojtur flamurin tonë, krenarinë tonë që i lidh shqiptarët kudo. Me shekuj nga Skënderbeu flamuri jonë kombëtar ishte dhe mbetet simbol i civilizimit në këtë rajon dhe më gjerë”, deklaroi Gjeloshaj.

“Ne jemi popull autokton, e respektojmë Malin e Zi si shtetin tonë dhe simbolet nacionale të Malit të Zi, këtë e kemi treguar vazhdimisht, por urrejtja e shprehur nga disa institucione ndaj flamurit kombëtar të shqiptarëve në Malin e Zi është një problem që tashmë është rast neuropsikiatrik. Me këtë rast ne e ftojmë publikisht Kryetarin e Kuvendit, z. Brajoviq, që në seancës së parë të rregullt të përfshihet në rendin e ditës Ligji mbi Simbolet nacionale të miratuar nga Qeveria e Malit të Zi në tetor 2017 dhe të dërgoi në Kuvend dhe propozimin për ndryshimin e Ligjit për Rendin Publik të dorëzuar nga nënkryetari i Parlamentit të Malit të Zi , Genci Nimanbegu pak ditë më parë në procedurën parlamentare”, deklaroi Gjeloshaj.

Gjeloshaj u bën thirrje qytetarëve të cilët ndëshkohen për arsye që e duan vetën dhe flamurin e vetë, që ti lajmërohen Alternativës Shqiptare në mënyrë që të marrin të gjitha shpenzimet që mund ti kenë derisa përfaqësuesit e shqiptarëve të zgjidhim këtë problem në mënyrë insitucionale.

“Gjithashtu u bëjmë thirrje që të vazhdojnë të shfaqin flamurin e tyre kombëtar dhe të durojnë edhe ndonjë ditë  disa individë  të mbetur që urrejnë shqiptarët, e të cilët janë ende në disa punë përgjegjës në Malin e Zi”,  përfundoi Gjeloshaj.

SHARE